ਪਹਿਲੇ 100 ਦਿਨ ਲੋਕਾਂ ਨੂੰ ਮਾਸਕ ਪਾਉਣ ਨੂੰ ਕਹਿਣਗੇ ਬਾਇਡਨ

ਵਾਸ਼ਿੰਗਟਨ (ਏਜੰਸੀਆਂ) : ਅਮਰੀਕਾ ਦੇ ਨਵੇਂ ਚੁਣੇ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਵੀਰਵਾਰ ਨੂੰ ਕਿਹਾ ਕਿ ਰਾਸ਼ਟਰਪਤੀ ਦਾ ਕੰਮਕਾਜ ਸੰਭਾਲਣ ਪਿੱਛੋਂ ਉਹ ਸਭ ਤੋਂ ਪਹਿਲਾਂ ਦੇਸ਼ਵਾਸੀਆਂ ਨੂੰ 100 ਦਿਨਾਂ ਤਕ ਮਾਸਕ ਪਾਉਣ ਦੀ ਅਪੀਲ ਕਰਨਗੇ। ਉਨ੍ਹਾਂ ਦੇ ਇਸ ਕਦਮ ਨੂੰ ਮਹੱਤਵਪੂਰਣ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਡੋਨਾਲਡ ਟਰੰਪ ਨੇ ਕੋਰੋਨਾ ਦੀ ਰੋਕਥਾਮ ਲਈ ਮਾਸਕ ਪਾਉਣ ਦੇ ਉਪਾਅ ਨੂੰ ਕਦੀ ਵੀ ਬਹੁਤੀ ਤਰਜੀਹ ਨਹੀਂ ਦਿੱਤੀ। ਦੱਸਣਯੋਗ ਹੈ ਕਿ ਕਈ ਸਿਹਤ ਮਾਹਿਰਾਂ ਦਾ ਮੰਨਣਾ ਹੈ ਕਿ ਮਾਸਕ ਪਾਉਣਾ ਇਸ ਮਹਾਮਾਰੀ ‘ਤੇ ਕਾਬੂ ਪਾਉਣ ਦਾ ਬੇਹੱਦ ਕਾਰਗਰ ਤਰੀਕਾ ਹੈ। ਇਨਫੈਕਸ਼ਨ ਨਾਲ ਹੁਣ ਤਕ ਅਮਰੀਕਾ ਵਿਚ ਪੌਣੇ ਤਿੰਨ ਲੱਖ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।

ਬਾਇਡਨ ਮਾਸਕ ਪਾਉਣ ਦੇ ਮੁੱਖ ਸਮੱਰਥਕ ਰਹੇ ਹਨ ਅਤੇ ਉਨ੍ਹਾਂ ਨੇ ਇਸ ਨੂੰ ਦੇਸ਼-ਭਗਤੀ ਪ੍ਰਗਟਾਉਣ ਦਾ ਇਕ ਤਰੀਕਾ ਦੱਸਿਆ ਹੈ। ਚੋਣ ਪ੍ਰਚਾਰ ਦੌਰਾਨ ਵੀ ਬਾਇਡਨ ਨੇ ਇਸ ਦਾ ਵੱਧ ਚੜ੍ਹ ਕੇ ਸਮਰਥਨ ਕੀਤਾ। ‘ਸੀਐੱਨਐੱਨ’ ਦੇ ਜੈਕ ਟੈਪਰ ਨਾਲ ਗੱਲ ਕਰਦੇ ਹੋਏ ਬਾਇਡਨ ਨੇ ਕਿਹਾ ਕਿ ਉਹ ਅਗਲੇ ਸਾਲ 20 ਜਨਵਰੀ ਨੂੰ ਅਹੁਦਾ ਸੰਭਾਲਣ ਦੇ ਨਾਲ ਹੀ ਅਮਰੀਕਾ ਦੇ ਲੋਕਾਂ ਨੂੰ 100 ਦਿਨਾਂ ਤਕ ਮਾਸਕ ਪਾਉਣ ਦੀ ਅਪੀਲ ਕਰਨਗੇ। ਉਨ੍ਹਾਂ ਕਿਹਾ ਕਿ ਕਾਰਜਭਾਰ ਸੰਭਾਲਣ ਦੇ ਪਹਿਲੇ ਦਿਨ ਲੋਕਾਂ ਨੂੰ ਅਪੀਲ ਕਰਾਂਗਾ ਕਿ ਉਹ 100 ਦਿਨਾਂ ਤਕ ਮਾਸਕ ਪਾਉਣ। ਇਨਫੈਕਸ਼ਨ ਦੇ ਵੱਧਦੇ ਮਾਮਲਿਆਂ ਨੂੰ ਦੇਖਦੇ ਹੋਏ ਮੈਨੂੰ ਲੱਗਦਾ ਹੈ ਕਿ ਇਸ ‘ਤੇ ਜ਼ੋਰ ਦੇਣਾ ਜ਼ਰੂਰੀ ਹੈ।

ਹਾਊਸ ਫਾਰੇਨ ਅਫੇਅਰਸ ਕਮੇਟੀ ਦੇ ਪ੍ਰਧਾਨ ਹੋਣਗੇ ਗ੍ਰੇਗਰੀ

ਅਮਰੀਕੀ ਐੱਮਪੀ ਗ੍ਰੇਗਰੀ ਮੀਕਸ ਨੂੰ ਵੀਰਵਾਰ ਨੂੰ ਸ਼ਕਤੀਸ਼ਾਲੀ ‘ਹਾਊਸ ਫਾਰੇਨ ਅਫੇਅਰਸ ਕਮੇਟੀ’ ਦੇ ਅਗਲੇ ਪ੍ਰਧਾਨ ਦੇ ਰੂਪ ਵਿਚ ਨਾਮਜ਼ਦ ਕੀਤਾ ਗਿਆ। ਦੇਸ਼ ਦੀ ਵਿਦੇਸ਼ ਨੀਤੀ ਨੂੰ ਆਕਾਰ ਦੇਣ ਵਿਚ ਪ੍ਰਭਾਵਸ਼ਾਲੀ ਭੂਮਿਕਾ ਨਿਭਾਉਣ ਵਾਲੇ ਸੰਸਦ ਦੇ ਇਸ ਪੈਨਲ ਦੀ ਅਗਵਾਈ ਕਰਨ ਵਾਲੇ ਉਹ ਪਹਿਲੇ ਅਫਰੀਕੀ ਮੂਲ ਦੇ ਅਮਰੀਕੀ ਹੋਣਗੇ। ਮੀਕਸ, ਸਾਥੀ ਡੈਮੋਕ੍ਰੇਟਿਕ ਐੱਮਪੀ ਇਲੀਅਟ ਏਂਜਲ ਦੀ ਥਾਂ ਲੈਣਗੇ। ਮੀਕਸ ਨੇ ਕਿਹਾ ਕਿ ਆਗਾਮੀ ਸੰਸਦ ਦੇ ਅਧੀਨ ਕਮੇਟੀ, ਅਮਰੀਕੀ ਵਿਦੇਸ਼ ਨੀਤੀ ਵਿਚ ਇਕ ਇਤਿਹਾਸਕ ਬਦਲਾਅ ਲਿਆਏਗੀ। ਸਾਡੇ ਸਾਹਮਣੇ ਕੰਮ ਦੀ ਕੋਈ ਕਮੀ ਨਹੀਂ ਹੈ। ਸਾਨੂੰ ਨਾ ਕੇਵਲ ਇਕ ਅਜਿਹੀ ਦੁਨੀਆ ਨਾਲ ਫਿਰ ਤੋਂ ਜੁੜਨ ਦੀ ਲੋੜ ਹੋਵੇਗੀ ਜਿਸ ਨੇ ਅਮਰੀਕੀ ਵਿਸ਼ਵ ਲੀਡਰਸ਼ਿਪ ਦੀ ਗ਼ੈਰ-ਮੌਜੂਦਗੀ ਨੂੰ ਮਹਿਸੂਸ ਕੀਤਾ ਹੈ ਸਗੋਂ ਸਾਨੂੰ ਵਿਦੇਸ਼ ਨੀਤੀ ਦੇ ਪ੍ਰੰਪਰਿਕ ਦਿ੍ਸ਼ਟੀਕੋਣ ‘ਤੇ ਵੀ ਪੁਨਰਵਿਚਾਰ ਕਰਨਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਇਹ ਸਾਧਾਰਨ ਸਥਿਤੀ ਵਿਚ ਪਰਤਣਾ ਨਹੀਂ ਸਗੋਂ ਕੰਮ ਕਰਨ ਦੇ ਇਕ ਨਵੇਂ ਤਰੀਕੇ ਵੱਲ ਵੱਧਣਾ ਹੋਵੇਗਾ। ਅਸੀਂ ਆਪਣੇ ਦਾਇਰੇ ਵੱਡੇ ਕਰਾਂਗੇ ਅਤੇ ਦੁਨੀਆ ਦੇ ਉਨ੍ਹਾਂ ਹਿੱਸਿਆਂ ਨਾਲ ਸੰਪਰਕ ਕਰਾਂਗੇ ਜਿਨ੍ਹਾਂ ਦੀ ਅਸੀਂ ਇਤਿਹਾਸਕ ਰੂਪ ਤੋਂ ਅਣਦੇਖੀ ਕੀਤੀ ਹੈ।